The Lorenzo Makoy Experience

"Kadyot lang, kadyot lang, kadyot lang-lang!"  Tama po kayo, tungkol naman sa radyo itong blog entry ko na ito.

Kahapon kasi, nang medyo male-leyt na ako sa pagpasok sa opisina ay naisipan kong pumara ng taksi para naman medyo mabilis at hindi ako mahuli sa oras ng pasok ko.  As usual, binuksan ni manong taksi drayber ang radyo ng kanyang taksi sa paboritong istasyon ng mga drayber na nasasakyan ko, mapa-FX man o dyipni, pati na rin ang mga taksi…kailangan pa bang i-memorize iyan?

Nang nasa may Project 3 ako sa kyusi nang bandang 9:30 ng gabi, biglang pumasok ang promo plug ni "kadyot lang" dito sa radyong ito pagkatapos ng kanta ng Cueshe (hehe), at nagulat ako dahil parang nauulit muli ang history at dito naman sa radyo nag-uumpisa.

Heto ang plug:

Pinong: Kadyot lang, kadyot lang, kadyot lang-lang!
Kukurukuku, bakit naka-dobol R siya?

Kukurukuku:  Isipin mo na lang, Love Radio iyan!  Hahahaha!  Ubo-ubo-ubo! Tagos ba?  Kailangan pa bang i-memorize iyan?

Okay, ibang level na ito.  Alam naman nating lahat na ang dobol-R na sinasabi dito eh ang istasyon ng radyo ng ABS-CBN, ang DWRR 101.9.  Giyera na ba ito?

Naaalala ko nang mag-umpisa ang network war sa telebisyon naman noong mid/late-80’s nang mag-komersiyal ang ABS-CBN ng isang logo ng rainbow na may pagong sa ilalim - obvious na pinatatamaan nila ang bagong labas na rainbow satellite ng GMA-7 noon. Na-shock ako nang una kong makita ito.  Sa mura kong edad noon, parang hindi ako sanay pa na may nagbabangayan sa ere sa pagitan ng mga TV Station. And the rest is history. Sino na ba ang number one at pinag-uusapang istasyon ng telebisyon ngayon?  Hindi ba, ang saya saya?

Dinadala na ba ng Love Radio ang network war sa radyo at gagamitin din nila ang "tried and tested" formula para maging number one sa ere?  Abangan na lang natin.

Kailangan pa bang i-memorize iyan?

Kahapon ng Lunes, dahil bakasyon ang inyong lingkod eh naisipan kong lumabas ng bahay at mamasyal sa Gilmore upang bumili ng external usb hard drive enclosure para naman makopya ko ang mga paborito naming mga scandals kay Monching na mahilig mag-download ng lahat ng ito from A to Z! Name it, meron niyan si Monching.

Sa aking paglilibot dito sa Gilmore eh dinala ako ng aking mga paa hanggang sa Broadway Centrum dahil tanghali na at medyo mainit na rin ang panahon ngayon, gutom at uhaw ang inabot ko dito sa pagka-canvass ng murang hard drive enclosure.  Napansin ko medyo maraming tao ang nakapila sa may lobby, ah okay, dito nga pala ginaganap sa Broadway ang "number one" daw na noontime show ng Pilipinas - ang Eat Bulaga!

Na-curious naman ako at pumasok ako sa studio ng Eat Bulaga, ayos walang nakapansin sa akin kahit na sobrang dami ang nagsisiksikan at hinaharang sila ng guwardiya para hindi sila makapasok (hmmm…bakit kaya hindi nila ako hinarang? Mukha na rin ba akong artista?).  At hayun, nakapasok ako ng walang kahirap-hirap at dala ko pa ang aking bag saka ang aking cellphone kahit na bawal itong ipasok sa loob ng studio.

Mainit na rin dito sa loob ng studio ng Eat Bulaga, para na ring impiyerno sa dami ng tao, ayos sana kung medyo mainit at siksikan pero may napansin akong hindi kanais-nais dito sa loob ng studio nila - masungit at maangas ang mga guwardiya sa loob, hindi kamukha noong mga guwardiya sa entrance.  Bakit ko nasabi iyan? Dahil may mga audience sa loob ng studio na gustong lumabas dahil naiinitan na sila at sobrang siksikan, ang iba ay gutom na uhaw pa at maiiihi na, pero ayaw silang palabasin nitong guwardiyang ito, kesyo tapusin daw muna ang show dahil bawal daw lumabas ang mga tao.  Hello?  Ano ito concentration camp ng mga hudyo?  Parang heneral ng Nazi itong guwardiyang ito, isa-isang pinagagalitan ang mga audience sa loob ng studio.  Actually, hindi na boses ni bossing ang naririnig ko kundi ang boses na niya sa loob.  Nakaka-distract.

Naawa na rin ako kay lola dahil sa malayong lugar pa siya nanggaling para mapanood lamang sina bossing, pero anong ginagawa ng guwardiyang ito sa kanya?  Pinagalitan, pinagsabihan, at hindi man lamang nakatikim si lola ng "courtesy" mula dito sa guwardiyang ito. At ang nakakainis pa, eh ganito ang sinabi niya sa lahat ng audience sa loob:  "Bawal pong lumabas hangga’t hindi natatapos ang show, kung ayaw nyo ng ganito, HUWAG NA LANG KAYONG MAGPUNTA AT MANOOD DITO!!! Naiintindihan ba niyo???" Wow, ang angas talaga ni manong.

Tiningnan ko ang mga nakakaawang audience sa loob, basang-basa na sila lahat ng pawis at nagsisiksikan pa, gusto mang lumabas ng iba para makalanghap ng sariwang hangin at uminom ay wala silang magagawa, dahil hinaharang sila ni Hitler na guwardiya.

Nang matapos ang show, isang salita lang ang narinig ko kay lola at lahat ng mga kasama niya sa studio - "Hinding-hindi na ako babalik dito at manonood ng Eat Bulaga, tandaan niyo iyan!!!"

Well, kung nababasa ito ng mga taga-Eat Bulaga, sana naman ay maging mabait kayo sa mga audience ninyo, dahil kapag nagalit sila, sila rin ang magpapabagsak ng ratings ninyo.  Siyanga pala, nakita na ba ninyo ang ratings ninyo ngayong linggo na ito?  Obvious naman hindi ba, medyo angat na ang Wowowee ni Willie.  Alam na rin naman nating lahat na umabot na rin ng mahigit dalawang dekada ang Eat Bulaga at hanggang ngayon ay patuloy na nagbibigay ng kasiyahan sa mga tao, pero huwag naman sanang pumasok ang hangin sa ulo ng mga tao sa likod nito ang inabot nilang tagumpay upang tratuhin ng ganyan ang mga parukyano nila.

The viewer is the Boss, tandaan sana nating lahat iyan.